Futbol eskolen arteko Bixente Etxeandia txapelketak Bergara, Oñati, Arrasate eta Aretxabaletako 8 eta 10 urte arteko neska-mutikoak elkartu ditu Ibarra futbol zelaian. Abenduaren 26tik 28ra bitartean 400 bat neska-mutiko ibili ziren norgehiagokan, eta atzo, urtarrilak 2, finalak jokatu eta sariak banatu zituzten. Eguraldia lagun giro polita izan zen Ibarran egun guztietan.
Norgehiagoka biziak
2004an jaiotakoen arteko finala UDA eta Mondraren artean jokatu zuten. Etxeko taldea hasi zen irabazten baina segituan berdindu zuen Mondrak. Bigarren zatian hiru gol sartu zituen UDAk erreskadan eta lasaitu egin zen; hori aprobetxatuta Mondrak gora egin zuen eta ia berdintzea lortu. Bukaeran etxekoak nagusi: UDA 4 Mondra 3.
Mondrak eta Aloñak jokatu zuten 2003koen arteko finala. Hasi orduko sartu zuen Aloñak gola eta argi geratu zen nagusi izango zela; atsedenaldian 0-2. Bigarren zatian Mondrakoak gogotsu hasi ziren baina indarrak ahultzen joan zitzaizkien eta gol zaparrada jaso zuten. Bukaeran, Mondra 0 Aloña 8.
Norgehiagoka parekatuena 2002an jaiotakoek jokatu zuten, UDAk eta Mondrak, hain zuzen. Mondrak egin zuen lehenengo gola baina laster berdindu UDAk. Bigarren zatian UDAk gogotsu jardun zuen golaren bila, baina ezin. Azken bost minuturen faltan iritsi zen etxekoen gola, baita berdindu ere Mondrak azken minutuan. Hala, UDA 2- Mondra 2. Penaltietan erabaki zen irabazlea, eta hor ere oso berdinduta ibili ziren; azkenean UDA nagusi.
Bixente Etxeandiak, jokalari, entrenatzaile eta UDAko presidente ohiak, eta Alberto Albistegi ohorezko erregionaleko taldeko entrenatzaileak eman zizkien sariak.