Joan den azaroaren 20an Eusko Legebiltzar berria eratu ostean, gaur hasiko da datozen lau urteotarako lehendakaria hautatzeko osoko bilkura, bi hautagairekin: EAJko Iñigo Urkullu eta EH Bildu koalizioko Laura Mintegi.
09:30ean ekingo diote osoko bilkurari, indar politiko guztiak ordezkatzen dituen Eusko Legebiltzar berrian. Mintegi izango da lehena hitza hartzen. Ordu eta erdi izango du bere proiektua azaltzeko eta, hautagaitza aurkeztean EH Bilduko kideek adierazi zutenez, EAJrenaz "bestelako aukera bat badagoela erakusteko". Ondoren izango da Urkulluren txanda, eta denbora tarte bera izango du hark ere. Hiru gai nagusitan banatuko du Urkulluk hitzaldia, berri agentziek alderdi jeltzaleko iturriak aipatuz zabaldu dutenaren arabera: krisiaren aurkako borroka; bakegintza, normalizazioa eta elkarbizitza; eta, azkenik, estatus berri baterako proposamena.
Arratsaldean, gainontzeko alderdien txanda
Baina bi hautagaiez gain, gainontzeko indar politikoek ere izango dute hitz egiteko aukera gaurko osoko bilkuran. Eguerdiko etenaldiaren ostean, 14:30ean jarraituko du saioak, eta ordu erdiko tartea izango du legebiltzarkide talde bakoitzak: Gorka Maneirok (UPyD), Antonio Basagoitik (PP) eta Patxi Lopezek (PSE-EE) hitz egingo dute, baita EH Bilduko Julen Arzuagak eta EAJko Joseba Egibarrek ere.
Hurrengo urratsak
Bihar lehendakari izendapena lortu ostean, kargua hartzeko ekitaldia zapatuan egiteko asmoa du Urkulluk, Gernikako Juntetxean; Gernikako Estatutua erabiliko du kargua hartzean. Berri agentzien arabera, domekan ezagutaraziko du nork osatuko duen bere gobernua eta, astelehenean gobernua osatuta, martitzenean bertan egingo du gutxiengoan gobernatu beharko duen Jaurlaritza berriaren lehen gobernu kontseilua, 2013rako aurrekontuak prestatzeko. Sail kopurua hamarretik zortzira jaisteko asmoa du Urkulluk eta, jakinarazi zuenez, lau emakume eta lau gizonezko izango dira sailburu.