Gaur gauean, Malagako Jose Carlos Garcia chefa, Café de Paris jatetxekoa eta bart Michelinen izarra jaso berri duena, Basque Culinary Centerreko ikasleekin batera arituko da 50 lagunentzako oturuntza bat prestatzen. Ekitaldia ikasleek abian jarri duten ekimenaren baitan kokatzen da. 'Ezagutu etorkizuneko chefak' izenburupean, hilean behin, BCCko sukaldera etortzeko gonbidapena luzatzen zaio izen handiko sukaldari bati.
Zapore anitzen nahasketa
Ikasleek autogestionatutako ekintza da eta chef gonbidatuak, ikasleen laguntzarekin, janariak prestatzeaz gain, bere sukaldaritzako bizipenak partekatzen ditu. Jose Carlos Garcia chefak bere dotorezia ekarriko du Donostiara, teknika eta irizpide modernoak erabiliz, baina betiere, produktuaren eta zaporearen errespetuan oinarrituta. Afaria hainbat herrialdetako produktu eta zaporeen nahasketa izango da. Besteak beste, tomate eta urdaiazpikozko bizkotxo gazia, erremolatxa-ogia, jogurta eta ozpin-hautsa, zigala-daikon-martorria edota gazta-tartazko maskorra eta marsmallow pasioa dastatu ahal izango dira.
Ikasleak protagonista
Zikloak helburuetako bat, ikasleek talde-lana garatzea da; horrela, autonomia eta ardura areagotu eta sukaldaritzako eta zerbitzuko aukeren inguruko ezagutza eta eskarmentua barneratzen dute. Ikasleek hasieratik amaierara gobernatzen dute jarduera: erreserbak kudeatzea, komunikazioa, kudeaketa ekonomikoa, erosketak, salmentak, zerbitzua ... Gainera, sukaldariaren aginduak jarraituz, ikasleek eurek aurreprestatuko dituzte platerak zein aurretiko prestaketa. Azken batean, dena prest izango dute sukaldaria afaria prestatzera iristen denerako.
Autofinantziazioa
Afarietan lortutako diru-sarrerak erabiliz finantziatuko dute produktuen erosketa, eta euren ardurapean egongo da emaitza ekonomikoa. Galerarik izatekotan, euren gain geldituko da; dirurik irabaztekotan, aldiz, ikasleek bidaiatzeko edota erakunde ongile bati emateko erabiliko dute.