Kooperatibak, lan-sozietateak, mutualitateak, gizarteratze-enpresak, enplegu-zentro bereziak, arrantzale-kofradiak eta desgaitasun-sektoreko elkarteak dira hitzarmenaren hartzaile nagusiak. Enpresa horiek lehentasunezko baldintzak eta abantailak izango dituzte Euskadiko Kutxa Ipar Kutxaren finantza-zerbitzuak kontratatzeko.
"Gizarte-ekonomiako enpresen premia nagusiak betetzeko" diseinatu da hitzarmena, Euskadiko Kutxa Ipar Kutxak dioenez. Hala, ekintzaileek produkzio-jarduerari ekiteko eta garatzeko finantzaketa-lerro berriak ez ezik, enpresek likidezia uneoro izateko eta inbertsio berriak ahalbidetzeko produktuak ere eskainiko dira.
Gainera, gizarte-ekonomiako enpresek dirulaguntza-aurrerakinak eskuratu, bazkideen kapital-ekarpena erraztu eta nazioartera irteteko aholkularitza jaso ahal izango dute.
Lau hilean behin berrikusiko dira baldintzak
Hitzarmenak urtebete iraungo du eta luzatu ahal izango da.
Hitzarmenaren baldintza ekonomikoak eskatutako finantzaketa motaren, mailegu-epearen eta bezeroen kreditu-izaeraren arabera egongo dira. Nolanahi ere, baldintzak lau hilean behin berrikusiko dira.
Euskadiko Kutxa Ipar Kutxak honako webgune hau zabaldu du, finantzaketa-lerroei buruzko informazioa eskuragarri jartzeko: www.financiacioneconomiasocial.com.