32:29 izan zen Gartziaren denbora atzokoan, hala ere lasterketa ez zuen buruan hasi. Ibai Alba hernaniarra hasi zen tiraka, baina azken 4 kilometrotan, lasterketa Gartzia eta Ariznabarreta korrikalarien artean egon zen. Irabazleak, azken 2 kilometroetan hortzak estutu eta bakarrik heldu zen helmugara. Oier Ariznabar durangarra bigarren postuan amaitu zuen, 33:04 denborarekin eta hirugarrena, Ibai Alba izan zen 33:38ko denbora eginez.
Lasterketako lehen emakumea, Aitziber Urkiola eibartarra izan zen ibilbidea 40:43ko denbora eginez. Honek ere pozik bukatu zuen atzoko eguna, ez zuelako lasterketa irabaztea espero, eta azken txanpan herritarren indarrak aurrera jarraitzeko laguntza eman ziolako. Patinatzaileen artean lehena, Andres De Regil izan zen, galdakaokoak 21:06an burutu zuen Soraluze eta Bergara arteko ibilbidea, eta handbikean ostera, Ion Galarraga izan zen helmugara heltzen lehena, 21:08ko denbora lortuz.
Guztira, 434 parte hartzaile izan ditu aurtengoan Antxintxika krosak, 390 lagun korrika, 42 patinatzaile eta 2 handbike-ean, eskuekin bultzatzen den bizikletan. Aurreko urtean baino korrikalari gutxiagok parte hartu izan arren, pozik daude antolatzaileak aurtengo lasterketa Domu Santuko zubiarekin bat egin duelako.