Bost eduki edo arlo aztertuko dituzte: pertsona, gatazka, berradiskidetzea, egitasmoa eta heziketa. Aurreneko hiru arloak ikastaro eran landuko dituzte, moduluka, azaroaren 12an, 19an eta 26an, Arrasateko Kulturaten, 18:30etik 21:00etara. Eta azken biak, berriz, tutoretzapean eta bateratze lan eran, abenduan.
Une zailen aurrean, bizikidetza
Ikastaro hau antolatzeko arrazoiak gaurko testuinguruan kokatu dituzte Baketik-etik: "Une historiko zaila eta delikatua bezain garrantzitsua eta erabakigarria bizitzen ari gara. Testuinguru honetan geure gizarteak bizikidetzaren ikuspegi eraikitzailea partekatzeko eta bultzatzeko beharra dauka. Hauxe da formazio-programa honen zergatia eta helburua. Zergatiak partekatzeko beharrarekin du zerikusia, helburuak ikuspegi eraikitzaile hori bultzatzeko erabakiarekin du zerikusia".
Bakea oinarri
Oro har, baina, "helburu nagusia da gizartean bizikidetza eta berradiskidetze kultura berria" bultzatzea. Eta helburu zehatza, berriz, "gizarte, politika, erakunde, udal, elkarte, gazteri, hezkuntza edo komunitate mailan erantzukizunak dituzten ehundik gora lagunei formazio teorikoa eta praktikoa eskaintzea, bakean oinarritutako bizikidetza eraikitzaile baterako".
Irakasle, begirale, arduradun…
Ikastaroa doan da, eta "bizikidetza-kontuetan kezkak dituen edozein pertsonari dago zabalik. Bereziki, irakasleei, aisialdiko begiraleei, elkarteetako arduradunei, udal teknikariei, gizarte hezitzaileei, gizarte langileei eta bizikidetza-kontuetan erantzukizuna duten kargudunei, politikariei edo profesionalei".
Izenematea
Izena eman gura duenak hiru bide ditu: 943 25 10 05 telefonora deituta; info@baketik.org helbidera idatzita edo wwww.baketik.org atarira sartuta.