Azaroan sartzeko egun gutxi batzuen faltan, ohi baino goizago, zurituta esnatu dira mendi tontorrak gaur, domeka. Lainoak ez du askorik ikusten uzten, baina uda osteko lehen elur geruza ikusi dugu, esaterako, Kurtzebarrin eta Aloñan. Atzo, zapatua, 17:00etarako, Urbiatik Arantzazurako bidean, elurra zela kontatu ziguten fondako ugazabek; zuritzen ari zirela zelaiak. Debagoieneko txokoren bat zurituta aurkitu baduzu, bidali zure argazkia webmaster@goiena.com helbidera eta argitaratuko dugu.
Tenperaturak azken boladakoak baino dezente baxuagoak izan dira gaur goizean: zortzi graduren bueltan zebilen termometroa Arrasaten, eta bost graduko muga gainditu ezinik Arantzazun. Badirudi, baina, eguraldiak hoberako bidea hartuko duela datozen orduetan: eguerdi-arratsalde partean jasotzera egingo du eta elur maila 800 metrotik 1.000-1.200era igoko da.
Bihar, astelehena, goizean, zerua hodei gutxirekin egotea espero da eta, beraz, izotza egoteko arriskua dago.
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.