Behin betiko datuak heldu ahala sarean jarriko ditugu berehala: gure herrietako emaitzak, lurraldeetakoak zein Euskal Autonomia Erkidegokoak.
Goienako kazetari eta teknikari lan talde osoa ariko da lanean unean uneko informazioa zuei helarazteko. Lan talde osoa, aldi berean, lau hedabidetarako lanean: Goiena.net, Goiena telebista, Goiena papera eta Arrasate Irratia.
19:45etik aurrera zuzenean
Goiena telebistak zuzenean eskainiko du saio berezia 19:45etik aurrera, Goiatz Aranak eta Julen Iriondok aurkeztuta. Ondoan izango dituzte Elena Laka eta Ainhoa Larrañaga datuak interpretatzen, analisia egiten eta iritzia ematen. Zuzeneko konexioak egingo dituzte hauteslekuetatik eta alderdi politikoen egoitzetatik.
Lehenengo sondeoen emaitzak, eta, datuak heldu ahala, horiek ere pantailan izango dituzte ikus-entzuleek. Datuak ezagutu ostean, gure bailarako hautagaiekin ere izango gara, hauen inpresioak jasotzeko.
Sarean, uneoroko kontakizuna, informazio puntuala, izango duzue eta sare sozialetatik ere emango dizuegu informazioa.
Goiena paperekoa berezia, bihar
Goiena papera, bestalde, berezia izango da bihar: sei orrialde eskainiko zaizkie hauteskundeei. Datuak, grafikoak, legebiltzarkide debagoiendarrak, analisiak, iritziak…, Debagoieneko informazio osatu eta zehatzena. Egunkari saltokietan eskuratu ahal izango duzue bihar, astelehena, harpidedunak ez zaretenak. Horiek, etxean jasoko duzue-eta, betiko moduan.