Ford Mugarrik, gaizki jokatu arren, 31-26 menderatu zuen Escolapios: "Emaitzarekin pozik nago, baina ez jokoarekin. Nire taldea askoz gehiago emateko gai da eta gehiago eskatu behar diet. Defentsan zein erasoan eskas aritu ginen; ondo egonez gero alde handiagoarekin irabazteko moduko partidua zen", uste du Ane Herrerok. Bestalde, lesio garrantzitsuak ditu taldeak: Arkaitz Masip, Pello Olabarria, Kepa Isasmendi eta Oskar Macias lesionatuta daude.
Soraluce BKEk ere ez zuen partidu borobila egin baina estutasun handirik gabe gailendu zen Usurbilen aurrean (36-32): "Bi zatien hasierak motela egin ditugu baina gure jokoa berreskuratu dugunean lau edo bost goleko aldea lortu dugu. Gero arazo handirik gabe mantendu dugu alde hori. Partiduz partidu goaz, denboraldi hasieran ahalik eta puntu gehien batzeko", dio Josetxo Muniategik.