Errenten ordainketa-eza, etxebizitzaren narriadura edo hondatzea, eta nork bere buruarentzat edo gertuko batentzat etxebizitza nahi denean berreskuratu ezin izatea dira errentatzaile partikular batek izan ditzakeen arazo edo beldur nagusiak. ASAP programak lehenengo biak bermatzea du helburu –Deba Garaia Higiezinen Agentzia programa horretarako homologatuta dago– eta, hirugarrenari dagokionez, Hiri-errentamenduen lege berriak (aurreikuspenen arabera udazkenean indarrean sartuko dena) gaur egun indarrean dagoen hasierako epea bost urtetik hirura jaistea aurreikusten du. Gainera, jabeak etxebizitza behar izanez gero, berreskuratzeko aukera ematen duten egoera berriak jasoko dira.
Deba Garaia Higiezinen Agentziako Jesus Markaideren esanetan, gainera, ohiko etxebizitzaren errentamenduko errenten gaineko presio fiskala txikiago da, izan ere, errentamendu baten %5eko etekina interesen kasuan %8koaren parekoa izan daiteke.
Hori guztia kontuan izanda, Markaidek dio etxebizitzen errentamendua orain arte baino askoz ohikoagoa izango dela aurrerantzean.