Koloretsuak, dibertigarriak, freskoak, modernoak zein nostalgikoak, urruti ataratakoak edota etxean hartutakoak. Askotarikoak izan dira aurten Goienak antolatutako udako argazkien lehiaketan jasotako argazkiak. Ez da lan erraza izan, baina baditugu aurtengo irabazleak: Mikel Sedano oñatiarrak eskuratu du lehenengo saria Non dago ikurriña argazkiari esker. Atzo eman zioten saria Sedanori eta Bergarako KB Photoestudioko kideen eskutik jaso zuen argazki kamera digital dotorea.
Bigarren saria ere Oñatin geratu da, Mireia Agirianok eskuratu baitu Vespan lau haizetara argazkiarekin, eta hirugarren saria berriz, Garazi Olabarria bergararrentzat izan da, Bolivia gatzagetan izeneko lanarekin. Bestalde, web orrian boto gehien jaso duen argazkia ere saritu da: Mikel Uribarrenen Ur Jauzia. Eta botoa ematera animatu direnen artean zozketa egin eta Igor Setienek otarre bat irabazi du.
Urtez urte parte hartzea gora
Bergarako KB Photoestudioko kideek hautatu dituzte beste behin ere argazki irabazleak. Eta ez da lan erraza izan, aurtengo parte hartzearen datuak honakoak baitira: 158 lehiakide eta 675 argazki (iaz baino 147 gehiago).