Tarte horretako lanen aurrekontua 77 milioi eurokoa da eta Diputazioak ordainduko ditu. Kredituak eskatuko ditu horretarako: 2013an, 32,6 milioi euro; 2014an, 39,2; eta 2015ean, 5,1. Beasain-Bergara ardatzeko gainontzeko lanak Bidegik ordainduko ditu.
Beasain-Durango autobiaren Gipuzkoako zatia osatzeko gainontzeko lanak aurrera doaz; Zumarraga-Urretxu eta Legazpi arteko zatia izan da zirkulaziora ireki duten azkena, aurtengo maiatzean.
Urretxu eta Antzuola bitarteko lanak, bestalde, martxan daude; 2,7 kilometro luze da zati hori eta Deskargako mendatea hartzen du tartean. Hori dela eta, hain zuzen, lan horien aurrekontua 50 milioi eurora igotzen da; zati on bat 680 metro luze izango den tunela zulatzera bideratuko da. 9.000 ibilgailu igarotzen dira egunero Deskargako mendatetik. Lan horietara bideratuko den diru kantitatearen zati bat bidesari bidez bildu asmo dute.