EH Bilduri dagokionez, koalizioa osatzen duten lau alderdietako ordezkariak izango ditu zerrendako aurreneko postuetan. Gipuzkoan, Xabier Isasi irakasleak gidatuko du zerrenda. Bigarrena, Pello Urizar arrasatearra (EA) izango da; hirugarrena, Marian Beitialarrangoitia (ezker abertzalea), gaur egun Gipuzkoako Foru Aldundiko Komunikazio arduradura; eta laugarren postuan bailarako beste ordezkari bat egongo da: Rebeka Ubera elgetarra (Aralar), gaur egun Gipuzkoako batzarkidea Aralartik.
Bizkaian, Laura Mintegi lehendakarigaiak Maribi Ugarteburu (ezker abertzalea), Leire Pinedo (EA), Dani Maeztu (Aralar) eta Oskar Matute (Alternatiba) izango ditu bidelagun.
Araban, berriz, Belen Arrondo Stee-Eilaseko sindikalista izango da zerrendako burua; ezker abertzaleko ordezkari Hasier Arraiz zerrendako bigarrena izango da; eta hirugarrena, Eva Blanco (EA) Amurrioko zinegotzia.
Isabel Salud Arabako zerrendaburua
Mikel Arana Ezker-Anitza-IUko Koordinatzaile orokorra gaur arratsaldean izendatuko dute formazio horretako lehendakarigaia. Bilbon egingo duen batzarraren ostean, alderdiak publikoki aurkeztuko ditu hautagaiak. Goienak jakin duenez, horien artean, Isabel Salud bergararra izango da Arabako zerrendaburua eta Juan Luis Merino eskoriatzarra hirugarren joango da Gipuzkoatik.
EAJ alderdian ere badira debagoiendarrak
EAJren kasuan, Iñigo Urkullu, EBBren presidentea izango da alderdi horrek Lehendakarirako –eta Bizkaiko zerrendaburu– aurkeztuko duen hautagaia. Joseba Egibar izango da zerrendako lehena Gipuzkoatik eta Xabier Agirre Arabatik. Gipuzkoako zerrendei dagokienez, bertan daude Aitor Urrutia Eskoriatzako zinegotzia eta Maria Eugenia Arrizabalaga zinegotzia Antzuolan.
Sozialistak eta popularrak
Alderdi sozialistari dagokionez, Patxi Lopezek errepikatu egingo du eta Lehendakaritarako aurkeztuko du alderdiak. Gipuzkoan zein Bizkaian, lurralde bakoitzeko idazkari orokorrak izango dira zerrendaburuak: Iñaki Arriola eta Jose Antonio Pastor. Arabako zerrendak gaur eguerdian onartuko ditu lurralde horretako exekutibak.