Txina izugarri handia da eta gu ekialdialdean baino ez gara ibili. Hiriburu nagusienetan, Beijingen, Qingdaon eta Shangain eta horrek herrialdearen oso ikuspegi mugatua ematen duela garbi dago. Beijing izan zen Txinako gure atea. Hasieratik txundituta utzi gintuen. Hiri handia izan arren erosoa da eta metroan zein autobusean ibiltzeko ondo prestatuta. Harresi Handia, Tianamen, Hiri Debekatua, Hutongak, jateko toki bikainak… gustora ibili ginen Beijingen. Baita lau urteko seme Paulo ere, batik bat zoo-an eta aquarium-ean.
Qingdaoko hondartzetara
Beijingetik Qingdaora tren azkarrean joan ginen. 5 ordura dago eta han jokatu ziren 2008ko joko olinpikoetako uretako kirolak. Txinatarrentzat udako opor lekua da. Izan ere, txinatarrek ere badute aisialdia, eta ondo dakite ondo nola pasatu. Qingdaoko alde zaharrak oraindik mantentzen du lehengo xarma; alde berriak berriz eraikuntza moderno eta etxe orratz ugari ditu. Hondartzei dagokienez, gustora egoteko modukoak ziren eta toaila lurrean jartzeko inongo arazo barik.
Shangai distiratsua
Shangai ekonomia aldetik Txinako hiririk garrantzitsuena da. Edonora begiratuta Ferrariak, Lamborghiniak, Audiak, Porscheak, Chanel, Gucci… ikus zitezkeen. Etxe orratzen itzalpean Asiako Paris deitzen dioten hiriak mantentzen du oraindik iraganeko xarma eta dotoretasuna. Eguzkia desagertu eta iluntasuna nagustzen denean, ia zerua ikutzen duten eraikinen argi disdiratsuek Shangai dotore janzten dute. Onerako edo txarrerako Shangai ikusi eta gero eskema asko aldatu zaizkigu.