Boluntario gutxiago, eta ondorioz gero eta elbarri gutxiago. Aurten, sukaldariak ere ezin izan du joan. Baina sekula baino zailtasun gehiagori aurre egin behar izan arren, 50 lagun inguru izan dira Degurixan asteburuan, 40 urteotako hitzorduari eutsiz. Oñati, Aretxabaleta, Arrasate, Bergara, Elgoibar, Zumarraga, Urretxu eta Donostiako elbarri eta boluntarioek parte hartu dute Behar Duzuna elkartearen txangoan, baita Bizkaikoren bat edo bestek ere.
Eroso eta ederto
Literadun denda handi bat, jatorduak prestatzeko txokoa, jangela... egonaldi ahalik eta erosoena egiteko tramankulu guztiak eroan dituzte. Baina garrantzitsuena: asteburu pasa mundiala egiteko gertu-gertu joan dira. Elbarriek zailtasunak izaten dituzte asteburu pasa joateko eta aukera hori eman gura izaten diete halako irteerekin. Haiek, gainera, gustura asko hartzen dute ekimena: "Zoragarria da elbarrituek ekintzetan erakusten duten bizitasuna ikustea. Eurak harritzen saiatzen gara. Zerbait ezberdina egiten", dio Amaia Lasaga boluntarioak.