Jon Muxikak 100 bizkarreko proban 1:00:41-eko marka egin zuen, eta zilarrezko domina irabazi. Distantzia horretan lehiatzearekin batera bergararrak 200 metro bizkarreko proban ere esku hartu zuen, baina epaileek lasterketatik kanpo utzi zuten, itzuli baten ostean ur azpian 15 metro baino gehiago egiteagatik.
Hala, bistakoa da Bergarako muxikatar anaiak sasoiko dabiltzala. Orain arte Jonen anaia Mikel Muxika nabarmendu da –aurten 23 urtez azpikoetan Euskal Herriko triatloi txapeldun izan da– Eta orain Jon da albiste, uretako lanean nabarmenduta. Sevillako hitzorduaren ostean, oraingoz, Jonek ez du atsedenik hartuko, hurrengo hitzordua Terrassan (Katalunia) egingo duten udako Espainiako Txapelketan izango duelako. Bergarakoarekin batera lehiatuko dira, baita ere, Aloña Mendiren beste bi harribitxi, Ane Sanz de Galdeano maila absolutuan –oso kontrario gogorrak izango ditu, sailkatze hutsa lorpen handia da–, eta kategoria txikietan Xabier Urbina.