Usurbil, Azpeitia, Lezo eta Tolosako alkateekin bildu da Garitano hondakinen kudeaketari buruz hitz egiteko. Alkateek jakinarazi diote udalen gehiengoak ez duela PPk, EAJk eta PSE-EEk eraiki nahi duten errauste planta finantzatuko, eta udalen borondatea kontuan hartzeko eskatu dute, hondakinak eurek kudeatu behar baitituzte.
Martin Garitano diputatu nagusiak adierazi die gehiengo ezberdinen arteko adostasunak lortzea ezinbestekoa dela, eta foru gobernuak hori lortzeko ahalegin berezia egin duela. Bere esanetan, azpiegiturak planifikatu behar dituzten erakundeek kontuan hartu behar dituzte hondakinak kudeatu behar dituzten gainerako erakundeak. Era berean, berretsi du Gipuzkoako Foru Aldundia ez dela udalen eskumenen gainetik jarriko, bere egitekoa udalei "laguntzea" delako. Aurrera begira udalekin lankidetzan jardungo duela iragarri du.