Donostiako Kalapie eta Oñatiko Txirrinka elkarteek antolatzen duten ekimena da eta helburu dute elkarbizitza bultzatzea. "Oinezko eta txirrindularien arteko errespetua beharrezkoa da eta baita errepideetako erabiltzaile ezberdinen arteko elkarbizitza" esan digu Daniel Enparantza Txirrinka elkarteko kideak.
Azpiegiturak ere ezinbestekoak direla adierazi du. Eta, hain zuzen, Debagoienera horrexegatik etorri direla zehaztu digu Enparantzak: bidegorrien lanei bultzada bat emateko. Bailarako herriak bidegorriaz lotzea egunerokotasunerako oso garrantzitsua dela gaineratu du.
Eusko Jaurlaritzak 98an egin zuen ingurumen deklarazioa ere ekarri du gogora Txirrinka elkarteko kideak. Deklarazio horren arabera, AP-1 egitearen ordainez, Debagoienean bidegorria egin behar zen. Oraindik, baina, egin gabe dago eta horixe kritikatu du Enparantzak.
Aldarrikapen horiek gure bailan egingo dituzte gaur. Izan ere, atzo iritsi ziren Arrasatera. Uarkapeko pilotalekuan gaua pasa ostean, 10:30ak inguruan ekin diote berriro ibilbideari. Aramaio, Aretxablatea, Urkulu eta Arrasatetik pasa ostean, Oñatin amaituko dute gaurko martxa. Zubikoa kiroldegian egingo dute lo. Zapatuan amaituko da Bizi Gira ekimena Donostian.