Europari finantza erakundeentzat erreskatea eskatu eta herritarrei laster neurri ekonomiko gogorrak hartuko dituela iragarri. Horixe egin du Espainiako Gobernuak. Izan ere, Europako Batzordeak gomendatu zion moduan, BEZ balio erantziaren gaineko zerga igotzea aztertzen ari da. Mariano Raxoi presidenteak ez du oraindik ezer zehaztu, baina BEZ murriztua (%8koa) eta supermurriztua (%4koa) duten produktuak BEZ orokorra dutenekin parekatzea aztertzen ari da, alegia, %18ra igotzea.
Zerga supermurriztua daukate oinarrizko elikagaiek (ogia, esnea, arrautzak, barazkiak, frutak…), liburuek, egunkariek, eskolarako materialak, etxebizitzek… Murriztua, berriz, prestatutako janariek, urak, garraioak, ostalaritzak, kultur ekitaldietako sarrerek…
Arrasateko Deba Garaia inmobiliariako Jesus Markaide, Antzulako Itzar liburu dendako Kontxi Laskurain eta Bergarako Olabe okindegiko Marixabel Moñuxekin izan gara. Ezkor ageri dira, BEZaren balizko igoeraren aurrean.