Atzo goizean jaio zen Debagoieneko ospitale berriko lehen umea. Eider Egües Bilbao du izena eta 3.100 gramo pisatu zituen. Gurasoak Bermeon bizi dira eta umea Arrasaten izatea erabaki zuten. Izan ere, bikoteak Haizea izeneko beste alaba bat dauka, ia 3 urte dituena. Haizea zesareaz jaio zen eta Eiderrekin Arrasaten daukaten protokoloa probatu gura izan dute. Hala, Arrasaten izandako esperientzia "oso ona izan da", Olatzen esanetan.
Bikote honek bazekien Debagoieneko ospitale berria inauguratzekotan zegoela, baina haiek ospitale zaharrera joan ziren. Horregatik, "sorpresa" izan da. Ospitale zaharreko erditze gelak ezagutzen zituzten eta ospitale berrikoak "1.000 bider hobeak dira", Olatzen ustez.