Gaur, eguena, egin dute aurkezpena, Euskal Autonomia Erkidegoko 100 bat alkate eta zinegotzi emakumezkorekin Bilbon egin den nazioarteko jardunaldian.
EAEko udaletan erantzukizun politikoko eginkizunak betetzen dituzten emakumeek parte hartu ahal izango dute eskolan, hala gobernukoek, nola oposiziokoek. Emakundek eta Biktimei Laguntzeko Zuzendaritzak esku hartzen dute proiektuan, instituzio lankide gisa.
Hainbat datu
Gaur egun, udaletan erantzukizun politikoko kargua duten emakumeen kopurua gizonena baino askoz baxuagoa da: alkate kargua dutenen %22 dira emakumezkoak eta zinegotzien %40,6; hiru lurraldetan, orotara, hautetsien %30 dira andrazkoak.
Harreman sareak
Bertako emakumeen arteko harreman sareak sortzeaz bat, nazioarteko sareekikoa ere bultzatuko da: eskolak nazioarteko ikuspegia izango du eta elkarlanean arituko da beste herrialde batzuetako antzeko eskolekin.
Ikastaroaren programa
Programaren lehenbiziko edizioa irailetik abendura bitartean izango da, eta era deszentralizatuan egingo da, hiru lurraldeetako hainbat udalerritan. Mintegiak, tailerrak, coaching saioak eta asteburu bateko iraupena izango duen barnetegi trinko bat eskainiko dira; berdintasun-arloko politiken esparruan adituak diren irakasleek eta aholkularitza-enpresek emango dituzte eskola guztiak.
Mintegi, tailer eta coaching saioen bidez, behar diren prestakuntza eta tresnak eskainiko zaizkie udal-arduradun horiei, dituzten gaitasun politikoak gara ditzaten, eta berdintasunari buruzko zeharkako ikuspegia bultza dezaten udaletako agenda politikoetan.
Proiektu berri honen bidez, Eudelek EAEko alkate eta zinegotzi andreen jabekuntza lortu nahi du, hartara, lider gisa aritu daitezen, berdintasunari buruzko politikak sendotzeko lanetan.
Eskolaren izenaren jatorria
Virginia Woolf Basqueskola izena Ingalaterrako idazle ospetsuaren izenetik eta idazle horren A Room of One’s Own (1929) lanetik jaso da. Era horretan, Araba, Gipuzkoa eta Bizkaiko emakume hautetsiek gune bat izango dute talde profesional modura hausnartzeko eta nork bere udalean egunero politikan aritzean generoa dela-eta dituen baldintzak eta mugak aztertzeko.