Agintzarik haur-etxea jarriko du Bergaran. Irailean hasiko da funtzionatzen eta Osintxu auzoan egongo da, Olatz Azkondoren etxean.
Haur-etxea 0 eta 3 urte arteko haurren zainketa arduratsua eskaintzen duen alternatiba berri bat da, eta, gehienez, lau haurtxorekin osatutako taldeetan egiten da, familia habia baten barruan. Familia habian konfiantzazko zainketa eskaintzea da asmoa, haurtxoarendako babes, maitasun eta segurtasunezkoa izango den familia-giroan. Jaurlaritzaren proiektu pedagogiko hori banakako arretan oinarrituta dago, eta haurtxo bakoitzak dituen premia eta garapen-erritmoetara egokituta.
Zaintzailearen etxean
Zerbitzua zaintzailearen etxean eskaintzen da. Era horretan zaintzailearen etxea familia habia bihurtzen da, haurtxoak zaindu eta hartzeko bereziki egokitutako eta hornitutako etxe bat. Hain justu, familia habia umearen etxearen hedapena izatea da helburua.
Zaintzaileei dagokienez, prestakuntza berezia eta akreditatua izan dute eta gainbegiratze pedagogikoa egiten zaie lanean. Hain justu, Jaurlaritzako Gizarte Ekimenak bultzatutako Agintzari proiektu kooperatiboaren barruan daude.
Informazio hitzaldiak
Zerbitzuaren gaineko xehetasunak emateko bi hitzaldi egongo dira datorren astean: hilaren 12an, Aretxabaletako Arkupen egingo dute, 18:00etan, Kuku Miku elkarteak antolatuta; Bergaran 14an izango da, 18:30ean, Miguel Altunan, Bizikasiren laguntzarekin.