2015eko apirilerako aurreikusten du Diputazioak GI-632 ardatza amaitzea eta, Ugarteren esanetan, Zumarraga-Urretxu tartea irekitzeak suposatzen du, pixkanaka, bukatzen doazela. Egindakoa "garrantzitsua" da, bi arrazoiengatik: "Beasain-Bergara ardatza osatzeko urrats garrantzitsua eman du Gipuzkoako Foru Aldundiak Bidegirekin batera. Izan ere, ekainaren 2tik aurrera, ibilgailuak Zumarraga eta Urretxu arteko zati berritik igaro ahalko dira, Zumarraga erdigunetik beharrean. Bestetik, Goierri, Debagoiena eta Debabarrena eskualdeak lotzeko eta Euskal Herriaren bertebraziorako pauso garrantzitsua izango da".
Beasain-Durango "estrategikoa" delako Aldundiarentzat, "proiektua aurrera ateratzeko apustua" egin du. "Nahiz eta kostu handiko azpiegitura izan, gipuzkoarrek eskertuko dute", azaldu du Larraitz Ugartek. AP-8, AP-1, N-1 eta Beasain-Durangok osatutako "Gipuzkoako biribilgunea" bukatzeko urrats bat gehiago da; gaitasun handiko lau bide horiek lurraldean barrena errazago mugitzea ahalbidetuko dute.
Berezitasunak
Zati berria 2,1 kilometro luze da eta ezaugarri nagusien artean ditu Argisaoko tunela (910 metro luze) eta Urolako zubibidea (266 metro luze eta 15 metroko altuera).
Bidegik zuzendutako eraikuntza lanak Amenabar-Bruesa aldi baterako enpresa elkarteak egin ditu, eta instalazio lanak Angel Iglesias S.A. eta Korostel S.L.k egin dituzte. Obra zibila 36 milioi euro kosta da.
Bertatik bertara ezagutzera joateko deia
Gaur, egubakoitza, arratsaldean bertara hurbiltzeko deia egin diete Aldunditik herritarrei, Argisaoko tunelaren ezaugarriak nahiz proiektuaren berezitasunak bertatik bertara ezagutzeko.
Urretxu-Antzuola
Bidegi hasita dago hurrengo zatia egiten, 2,7 kilometro luze izango den Antzuolarainoko zatia egiten, alegia; "tunelaren zatia" ere deitzen zaio, Deskargako tunela egitea izango delako tarte honetako zailtasun handiena. Lanak 50 milioi euro kostako dira eta zati on bat tunela (680 metro) zulatzera bideratuko da.
Antzuola-Bergara
Gipuzkoako azken tarteak, Antzuola-Bergara, 70 milioi euroko aurrekontua du eta Aldundiak ekingo die hori egiteko lanei, 2013ko urtarrilean. Errepide berria 2015eko apirilean helduko da Bergarara. Bertan beste egokitzapenik egitea ez da aurreikusten, hau da, ordainlekura arteko zatiak errei bakarrekoa izaten jarraituko du, "bikoa izateko adina zirkulazio ez dagoelako eta tarte horren bikoizketa saihestuta dezente aurrezten delako", Bide Azpiegituretarako diputatuaren esanetan.