Gogor kritikatu zuen Espainiako Gobernuak egin nahi duen erreforma: "Errentaren arabera sailkatzen ditu herritarrak, eta horrek osasunaren eskale bihurtuko lituzke hainbat lagun".
Horren aurka, Eusko Jaurlaritzak Euskadi Eredua proposatzen du, eta bertan, zerbitzu publikoei eustera konprometitzen da gobernua, "prestazio bat ere itxi gabe", lehendakariaren hitzetan. Bere iritziz, "aurrezten eta eraginkorrago izaten ahalegindu beharra dago, baina ez eskubideak eta zerbitzuak betirako txikitzearen truke".
Ekitaldian zehar, hauxe esan zuen Lopezek: "Gero eta gehiago, osasun zerbitzuak eta gizarte zerbitzuak koordinatu egin beharko dira". Adibide gisa aipatu zituen kronizitatea edo zahartzea, eta esan zuen Jaurlaritzaren asmoa dela "etxea arreta-zentro bihurtzea, etxera eroanda norberak behar dituen zerbitzuak".