Atzo, zapatua, egin zuen aurkezpena Topagunea Euskara Elkarteen Federazioak Kutxa-Ekogunean, eta funtzionamendua argia da: erabiltzaileak nahi dituen bi hizkuntza hautatu eta, une horretan, hizkuntza horien arteko oinarrizko hiztegia sortzen du datu baseak: maketatuta ematen du, Din A4 batean inprimatu, tolestu eta poltsikoan sartzeko prest. Komunikatzeko beharrezkoak diren oinarrizko nozioak biltzen ditu eta, esaldi horien artean, euskarari eta Euskal Herriari erreferentzia egiten dioten esaldiak ere bai, 43 hizkuntzetan; hori horrela, Hizkimizki "Euskal Herriaren enbaxadorea" izango dela esan daitekeela diote bultzatzaileek.
'Auzoko' egitasmoa
Hizkimizki.com webgunea Topagunearen Auzoko egitasmoaren baitan sortu da. Proiektua euskaratik urrun bizi diren herritarrak euskarara hurbiltzeko asmoa duen ekimena da.