"Estatuan aitzindaria" da banan-banakako orientazio modu hori, Lanbideko arduradunen hitzetan. Langabeak zein "enplegagarritasuna hobetu nahi" dutenak atenditu nahi ditu Lanbidek banaka, Gipuzkoa, Bizkaia eta Arabako bulegoetan dituen orientatzaileen bidez.
Lan-eskatzaile gisa izena ematen laguntzeaz gain, "Euskal Enplegu Zerbitzuko langile espezializatuek lan-eskatzailearekin batera egingo dute haren enplegagarritasunaren diagnostikoa eta lan-merkatuan sartzeko benetako aukerak lortzeko ekintzen ibilbide pertsonalizatua", azaldu dute Gemma Zabaleta sailburuak eta Lanbideko Lan Aktibazioko Zuzendariak, Mariano Cortesek.
Dirulaguntza jasotzen duten 43.000 lagun
Diru-sarrerak Bermatzeko Errenta (DBE) jasotzen dutenak lanera bideratzea lehentasun gisa jo dute Enplegu arduradunek. "Txoke-plan pertsonalizatua" egin dute, eta 2013ko bigarren hiruhilekoan bukatuko da hori, DBE jasotzen duten guztiak orientatuta: denetara, 43.000 lagun baino gehiago. Horietatik gehienak (%70) Bizkaian bizi dira; %17, Gipuzkoan, eta %13, Araban.
DBEren onuradunak lanera bideratzeko prozesua joan den abenduan hasi zen, DBE Eusko Jaurlaritza kudeatzen hasi zenetik. 2012ko lehenengo hiruhilekoan, Lanbideko orientatzaileek 6.804 onuradunekin "hasi dituzte enplegagarritasun-prozesuak", azaldu dute Zabaletak eta Cortesek. 43.000 lagun horiek orientatzea "Lanbideren proiektu anbiziodunenetako bat" dela azaldu du Enplegu sailburuak.
Banan-banako orientazio zerbitzua Lanbiden izena emanda dagoen edozeinendako izango da aukeran, ez bakarrik DBE jasotzen dutenendako. Ibilbide pertsonalizatua eginda, lan-eskatzaileek "Lanbideren baliabideak erabiltzeko aukera izango dute, hala nola lan-bitartekaritza, formazioa eta, lana topatzeko zailtasun handiagoak dituztenen kasuan, ibilbide osoan zehar laguntasuna jasotzeko aukera".
Abendura arte, eredu berri horrekin 92.479 lan-eskatzaile orientatu nahi ditu Lanbidek; horietatik %56,29 Bizkaian, %28,38 Gipuzkoan eta %15,33 Araban.