Arabako Batzar Nagusietan nazionalisten aulki batzuk hutsik zeuden atzo, astelehena, eta egoera horretaz baliatuta atera zuten aurrera mozioa sozialistek, popularren babesarekin. Horren bitartez, Diputazioari eskatzen diote Eibar-Gasteiz autobidearen irekieraren atzerapenak eragindako kalte eta galerak jasotzen dituen txosten bat egiteko maiatzean zehar. Behin hori eginda, Gipuzkoari aurkeztea da asmoa, "arabarrekin duten zorra gogora erazteko". 2008ko urrian ere onartu zuten gisa horretako mozio bat eta bete ez izana egotzi diete orduko kudeatzaileei.
Gipuzkoa, bere aldetik, Araba konpentsatzearen kontra egon da hasieratik, aldundi biek autobidea egin eta finantzatzeko akordioa izenpetu zutenean ez zutelako halakorik jaso. Gipuzkoatik diote, gainera, eurek ordaindu zutela Isuzkitzako tunela, zati baten Arabako lurretatik igarotzen den arren.
Historia luzea
Aspalditik dator hika-mika. Asmoa bazen ere 2008 urte hasieran irekitzea –hori izan zen ofizialki emandako azken data– autobidea bere osotasunean –46,2 kilometro– ez zuten zabaldu 2009ko maiatzaren 22ra arte.
Gipuzkoako zatian, Isuskitzako tunela egiteko lanetan sortutako ezusteko geologikoei egotzi zieten atzerapena.