Lehen hiruhilekoan, guztira 422.926 pertsonak hartu dute ostatu Euskadiko hoteletan. 5.641 turista gutxiago izan badira ere (% 1,3 gutxiago), 2012. urtearen hasiera euskal turismoaren historiako bigarren onena izan da.
Aurten jaso ditugun bisitarien kopurua duela hiru urte jasotakoarekin alderatuta, Euskadik lehen hiruhilekoan 2009an baino 60.000 turista gehiago izan dituela ikus daiteke.
Euskal Estatistika Erakundearen (Eustat) martxoko datuen arabera, Euskadiko turismoak bere historiako bigarren martxorik onena izan du aurten (170.166 sarrera). Iaz izan zen onena, 175.000 sarrera baino gehiagorekin,
Gipuzkoa izan da lehen hiruhilekoan turista gehien galdu dituen lurraldea : guztira, 2011n baino 6.479 gutxiago izan ditu (%4,3 gutxiago). Atzerriko turisten kasuan, joan den urtean baino 1.654 gutxiago izan dira. Espainiako turistei dagokienez, berriz, %4,5eko jaitsiera izan da (4.825 gutxiago). Nolanahi ere, 2012. urtearen hasiera Gipuzkoako turismoaren laugarren hasierarik onena izan dela nabarmendu du Eusko Jaurlaritzak.
Ostatu-gauei dagokienez, lehen hiruhilekoan 752.346 izan dira guztira Euskadin, hau da, joan den urtean baino 18.921 gutxiago.
Nekazaritza-turismoko establezimenduetan, 18.843 sarrera izan dira lehen hiruhilekoan. Horrek esan nahi du % 2ko jaitsiera izan dela joan den urteko aldi berarekin alderatuta.
Kalitatea eta lehiakortasuna
Turismo Sailak "sektorearen kalitatea eta lehiakortasuna sustatzeko ahaleginari eutsiko" diola esan du, eta gainerako erakundeekin lankidetzan jardutea "espero" duela esan du, Euskal Turismoaren Lehiakortasun eta Berrikuntza Planaren eta Marketin Planaren inguruan politika batzuk garatzeko.