Zazpi hilabete zituela, aurtengo otsailean diagnostikatu zioten gaixotasuna Fernandori, proba ugari egin ostean. Izan ere gaixotasun ezohikoa dauka Fenandok: Leuzemia Mielomonozitikoa. Bakarrik hezur-muinaren transplantearen bitartez osatu zitekeen gaixotasun mota da hori, eta Fernandoren gurasoen eta bestelako senideen hezur-muinak ez dira balekoak. "Genetika oso kapritxosoa da. Eta askoz errazagoa da familiakoak eta ingurukoak ez direnak konpatible izatea Fernandorekin”. Adierazi du amak Radio Euskadin.
"Maleta ilusioz betea"
Hala, laguntza eskaera egin dute emaileak lortzeko. "Egunak ahal dituen moduan pasatzen ditu. Arnasa hartzea kosta egiten zaio, ez du ondo lo egiten gaixotasuna aurrera doa eta ez dugu emailerik Fernandorendako”, gaineratu du.
Amak kontatu du Gurutzetako ospitalean artatzen dutela orain semetxoa, harik eta transplantea iritsi arte. "Orduan Bartzelonara bidaiatu beharko dugu. Eta ia bada bidaia hori egitea lortzen dugun, maleta ilusioz beteko dut. Izan ere, Fernandok merezi du aukera hori”.
Bizitza ematea
Bloga sortu dute semetxoaren egoeraren berri emateko: “Blog horrekin lortu gura duguna da jendea hezur-emaile egitea. Guretako bizitzako oparirik onena izango litzateke; eta emailearendako berarendako ere bai, bizitza emango luke-eta. Baina ez guretako bakarrik, gu moduko zenbat familia izango dira egoera berean! Halako egoera batean zaudenean konturatzen zara uste baino gehiago daudela”, dio Letizia Alvarezek.
Zela egin emaile
Alvarezek azpimarratu gura izan du hezur-muin emaile egitea ez dela askok uste bezain zaila: “Hezur-muin emaile egitea zer den ikertzen hastean konturatzen zara horren gaineko mito mordoa ditugula. Ia-ia odola ematea bezain erraza da. Ez da ospitaleratze beharrik. Asko jota medizina ematen dizute, buruko minik izanez gero horri aurre egiteko".
Zenbat eta emaile gehiago egin, aukera handiagoak izango ditu Fernandok. Informatzea da biderik egokiena. Akaso zure hezur-muina da Fernandori bizia eman dakiokeena.