Sei taldek hartu dute parte asteburuan Aretxabaletako Ibarra futbol zelaian jokatu den infantil mailako Debagoieneko futbol txapelketan: Leintz Kirol Elkarteak, UDAk, Bergarak, Aloña Mendik, Mondrak eta Eibarrek. Azken biak heldu ziren finalera eta Eibarrek irabazi zuen txapelketa, baina hori ez zen hain garrantzitsua. "Helburua zen jokalari denak lehialtasunez, giro onean, jokatzea, eta horrelaxe izan da. Joku zikinik gabeko txapelketa izan da eta oso pozik gaude", aitortu du txapelketa UDArekin batera antolatu duen Smash enpresako Jon Ander Azkoitiak. "Txapelketak jarraipena izatearen alde dago gainera UDA", jarraitu du Azkoitiak.
Zapatuko eta domekako zaparradek ez dute txapelketa zapuztu, ez harmailetako giroa ezta berdegunekoa ere. "Aupa Josu", "aurrera Xabi", "baloia gurea da", oihuka ikusleak batetik, eta bostekoak eta besarkadak bestetik jokalari guztien artean.