Goranzko bidean jarraitzen du langabe kopuruak Debagoienean ere: 3.287 ziren urtarrilean; 3.346, otsailean; eta 3.370, martxoan. 10,87an kokatzen da langabezia tasa.
Herriz herri, lanik gabeko gizon-emakume kopurua igo egin da Antzuola, Arrasate, Bergara, Elgeta eta Oñatin; jaitsi egin da, aldiz, Aretxabaleta, Eskoriatza eta Leintz Gatzagan.
Debagoienari dagokionean, 2010eko martxora arte egin behar da atzera egungo langabe kopurua gainditzen duen zifra bat aurkitzeko: 3.460 langabe zeuden orduan.
45.596 langabe Gipuzkoan
Langabeziak gora egin du Hego Euskal Herrian ere; Nafarroan, izan ezik, beste hiru lurraldeetan igo egin da. Hego Euskal Herrian, orotara, 213.470 pertsona zeuden lan barik martxo bukaeran; Araban, 25.267; Bizkaian, 91.055; Gipuzkoan, 45.596; eta Nafarroan, 51.552.