Elite eta 23 urtez azpikoen lasterketan, indarrak parean joan ziren Patxi Cia eta Diego Latasa nafarrak hirugarren itzulira arte. Ciak, baina, arazo fisikoak izan zituen eta lasterketa utzi behar izan zuen; estutasun handirik barik irabazi zuen Latasa zangotzarrak.
Emakumezkoetan, berriz, kontrariorik ez zuen izan Olatz Odriozola urnietarrak. Hasi bezain laster utzi zituen atzean bere kontrarioak, tartean Ainhoa Eraña arrasatearra. Bigarren posturako lehian, Estibalitz Gartziak lehen itzulian hartu zion aurre Erañari, eta hirugarren postuari eustearekin –arazo barik– konformatu behar izan zuen honek.
Junior mailan ere hirugarren amaitu zuen beste arrasatear batek, Jon Ander Kortabarriak, lehenengo itzulian erorita.
Bost kilometro pasatxo zituen Barajuengo zirkuituak, basoko bidezidor estuetan horietako asko. Lokatz apur bat ere bazen, eta zenbait eroriko eragin zituen horrek. Dena dela, ibilbidea asko gustatu zitzaien parte-hartzaileei. Openeko hurrengo proba Erandion izango da, apirilaren 1ean.