Herriotako merkatari eta herritarrak gustura geratu dira asteburuan. Oñatin outlet-a egin zuten aurreneko aldiz. Egubakoitzean hasi zen eta laneguna izan arren jende asko ibili zen, hurrengo egunerako utziz gero mauka besteren batek eramango zuenaren beldur. %80ko deskontuak ere ikus zitezkeen denda kanpoaldera ateratako produktuetan.
Zapatu eguerdian, berriz, bete- bete zegoen, adibidez, Kale Barria, eta dendariak zoratzen, uste zutena baino askoz hobeto zihoala eta. "Atzera geratzen ari ziren plater eta tazak atera ditugu, eta oso ondo saldu dira", zioen Juanitosako Amaia Arregik; "pena, geu beste dendetan ibiltzeko asti barik gabiltzala", Olalde oinetakoetako Kristina Bikuñak. Ez da seinale txarra.
Aretxabaletan, berriz, Iturrigorri frontoian egin zuten zapatuan Ixadebalde azokaren IV. aldia. Iaz garai honetan egindakoan baino gutxixeago, baina ondo saldu zela zioen Aretxarteko presidente Alberto Asensiok. Eguerdia izan zen une jendetsuena. 13 postu egon ziren, %50etik gorako deskontuekin.