Oñatin egin dute atzo eta gaur Gipuzkoako udalen Parte Hartzeko Sarea zehazteko 3. tailerra. Erakundeetan herritarren parte-hartzea bultzatzeko proposamena landu dute bertan elkarlanean udalek eta Foru Aldundiak: parte-hartze hori bultzatzeko erakundeen artikulazioak nolakoa behar duen aztertu dute. 35 udaletako ordezkariek hartu dute parte Orion hasi, Usurbilen jarraitu eta Oñatin amaitu den ekimenean, tartean Eskoriatzako, Arrasateko, Oñatiko, Antzuolako eta Bergarakoek, alkate, zinegotzi eta teknikariek, kasuan kasuko.
Ekimenaren emaitzen gainean galdetuta, Arantza Ruiz de Larrinaga Diputazioko Partehartzerako zuzendariak jakinarazi du adostu dutela erakunde desberdinek martxan jarritako herritarren parte-hartze esperientziak partekatzeko jardunaldiak egitea aurten bertan, batzuek besteen berri eduki ahal izateko. Esperientzia horiek sistematizatzea ere erabaki dute, jasotzea eta plataforma teknologiko batez bakoitzarena besteen eskura jartzea.