Parotiditis edo, arrunki esanda, papera kasuek gora egin dute azken asteetan eta, uneotan, epidemia dago; epidemia txikia edo arina, baina epidemia. Urtarrilaren 1etik martxoaren 6ra, Gipuzkoan, 131 kasu diagnostikatu dituzte; horietatik 25 Debagoienean, iazko kopuruaren bikoitza. Oñatiko ikastetxe batean izandako agerraldi edo broteak eragin zuzena izan du horretan.
Edozein kasutan, garai honetan ez da harritzekoa papera kasuek gora egitea. Izan ere, negu bukaera aldera, hotzarekin, gazteak gehiago batzen dira eta, ondorioz, errazagoa da euren artean kutsatzea.
Sintomak
Listu-guruinen inflamazioa, sukarra, buruko mina eta ondoez orokorra dira sintomarik ohikoenak, baita barrabilen handitzea ere gizonezkoetan eta obarioena emakumezkoetan. Erraz kutsatzen da eta, hori saiheste aldera, berebiziko garrantzia du higieneak.
Prebenitzeko: bakuna
Bakuna hartzea da paperak prebenitzeko modua, hiru bakuna hartzea: lehendabizikoa 12-15 hilabeterekin hartzean da, bigarren dosia 4 urterekin eta hirugarrena 11-12rekin. Kontua da, ordea, askotan ez dela lehen dosia besterik hartzen eta, ondorioz, ez dela inmunitatea behar bezala garatzen; horixe da, hain zuzen, uneotan paperak dituzten gazteen %85en kasua. Hiru bakunak ondo hartuta, hori bai, edo behin paperak izan eta pasata, bizi osorako inmunitatea lortzen da.
Bizpahiru astetan erabat osatzen da
Papera kasuak anbulatorioetan atzematen dituzte familia medikuek, eta asteburuetan baino ez ospitaleko larrialdietan. Eta behin diagnostikatuta, komeni da astebetean etxean geratzea atseden hartzen, klasekideak edo lankideak ez kutsatzeko. Bizpahiru astetan erabat osatzen da eta ez du inolako arrastorik uzten, baina kasurik txarrenean meningitisa eragin dezake. Baina horretara ailegatuta ere, gaixotasun birikoa litzateke eta ez bakterianoa, kontrolatzeko errazagoa, beraz.