Musika bizi-bizi, eta dendariak buru-belarri aurkitu ditugu gaur goizean goiz Arrasateko merkealdien azoka prestatzen. Arrasateko kaleetan "beherapen ikusgarriak" aurkituko ditugula kontatu du Angel Alonsok, Ibai Arte elkarteko zuzendaritzako kideak, "dendetan stockean ditugun produktuak saldu egin gura" dituztelako, udaberri-udako produktu berriei lekua egin ahal izateko.
10:00-20:00 da Merkemerkauak izango duen ordutegia. Eta iaz moduan, aurten ere karpak ipiniko dituzte erdigunetik urrun dauden komertzioek generoa bertan ipin dezaten, Seber Altuben eta Herriko plazan. Euria eginez gero, berriz, Seberreko saltokiak Biterira eta Olartera lekualdatuko dituzte.
Kale animazioa
Bestalde, kale animazioa ere iragarri dute: 11:00-13:00 Sanbamaña batukada; 16:30-18:00 Erraldoi eta Kilikien Konpartsa eta 18:00-20:00 Sanbamaña batukada.
Bergaran ere bai
Eta Arrasatez gainera, atzo moduan, Bergaran beherapenen azokarekin segituko dute bertako dendariek. Beraz, gaur ez dago aitzakiarik erosketak Debagoienean bertan ez egiteko.