Zein izango da zure lana ekitaldi nagusian?
Ez dakigu oso ondo. Aurten Bertsozale Elkarteak 25 urte egiten ditu eta saio guztia horren inguruan izango da. Seietako saioan 25 bertsolarik parte hartuko dugu, zenbaki borobila errespetatzearren.
Lehenengo aldiz hartuko duzu parte Bertso Egunean?
Pare bat bider izan naiz. Ariketa ezberdinak egiten dira egunean zehar: goizean, adibidez, kalean egiten den bertso-poteo estilokoan parte hartu izan dut, eta baita afalostean ere. Ekitaldi nagusian inoiz ez dut kantatu.
Zer da bertsolari batendako horrelako ekitaldi batean parte hartzea?
Euskal Herriko bertsolaritza panoraman bilgune garrantzitsuenetakoa da, eta, horregatik, pribilegioa da aukera hori edukitzea. Ni oso gustura nago eman didaten aukerarekin.
Zer esan gura du Bertsozale Elkarteak 25 urte betetzeak?
Elkartea eta bertsolaritza paraleloan doaz, elkarlotuta. Bata aldatzen den heinean bestea ere aldatu egiten da. Aldaketaz aldaketa indartu egin da eta esango nuke gaur egun euskal kulturgintzaren barruan kultura adierazpide batek duen adibide garbiena dela.
Asko aldatu da bertsolaritza 25 urte hauetan?
Bertsotan egiteko modua asko aldatu da. Orain dela 25 urte aukera gutxiago zeuden. Euskarak aurrera egin du eta horren adierazgarri da bertsolaritzak egin duen bide hori ere.