CEOE eta CEPYME patronalek CCOO eta UGT sindikatuekin egin dute akordio hori, nahiz eta Espainiako Gobernuak horretarako ipini zien epea aspaldi bukatuta egon.
Hona hemen neurri batzuk:
Soldatak:
- Soldatak handitzeko aurtengo muga %0,5 da, eta 2013koa, %0,6. Espainiako 2012ko abenduko KPIa %2 baino gehiago handitu bada, eguneratu ahal izango da soldata-handitzea.
- Sektore bakoitzeko negoziatzaileen esku geratzen dira soldataren gaineko gorabeherak.
- 2014rako nobedade handi bat: Espainiako ekonomiaren arabera handituko dira soldatak; eta soldaten zati bat enpresaren egoeraren araberakoa izango da.
Salbuespen egoerak:
- Krisia aintzat hartuta eta "langabezia maila izugarria" aitortuta, honakoa erabaki dute: "behin-behineko" eta "salbuespen neurri" gisa, enpresek indarrik gabe utz ditzakete lan-hitzarmenean adostutako erabakiak, arlo gehienetan: ordutegia, laneguna zelan banatu, txandak, ordainketa sistema eta beste.
- Salbuespen-neurri horiek justifikatu egin behar ditu enpresak: etekinak modu jarraian txikitzen doazela, edo hitzarmenean adostutakoa kaltegarria izan daitekeela frogatu beharko du. Akordioak ez du kopururik zehazten.
- Neurriak ez aplikatzeko, enpresak eta langileen ordezkariak ados jarri beharko dira.
- Gehienez, hiru urteko salbuespenak izan daitezke.
Enpresaren malgutasuna:
- Ohiko malgutasuna: ordaindutako aparteko lanorduak desagerreraraziko duen neurria, seguruenik; izan ere, enpresak berari komeni moduan bana dezake urteko lan-jardunaren %10 (gaur egun, %5 da), eta beste 5 eguneko koltxoia ere badauka. Ez dira %10 ordu gehiago, baizik eta urteko orduen %10 beste modu batera banatzeko eskumena.
- Ezohiko malgutasuna: arrazoi ekonomikoak, teknikak, antolakuntzakoak edo ekoizpenekoak izan behar dira, eta langileen ordezkariei denboraz jakinarazi behar zaizkie.
Lan-hitzarmenak:
- Aldaketa handiak hemen ere: enpresa hobesten da lan-eguna, funtzioak eta soldatak negoziatzeko esparru gisa. Estatuko hitzarmena hartzen dute abiapuntu gisa, baina enpresa-hitzarmena gailenduko da probintziako edo erkidegoko hitzarmenaren gainetik.
Arbitrajea:
- Enpresaren eta langileen ordezkarien arteko hitzarmenek arbitraje batera jotzeko, eta hark esandakoa betetzeko konpromisoa jaso behar dute. Negoziatzeko epeak bukatzen direnean, arbitrajea ezarriko da.
Ultra-aktibitatea:
- Sindikatuendako oso alderdi garrantzitsua izan da hau. Lan-hitzarmena negoziatzerakoan ez baziren ados jartzen, aurreko hitzarmenarekin jarraitzen zuten. Patronalen iritziz, horrek denbora-muga bat izan behar zuen.
- Orain, Lan Ministerioak epe batzuk ezarriko ditu. Arbitrajea hemen ere ezarri ahal izango da.