Atzo Etxarri-Aranatzen ekitaldia egin zen duela 35 urte Ikurrina udaletxe balkoian jarri zela gogora ekartzeko. Julian Unzueta Aramaioko orduko alkatea han izan zen. Ez, ordea, Jose Antonio Altuna Txatillo, erdi gaixorik zegoelako. Gaur Arrasate Irratian izan da orduko Arrasateko alkatea eta biek hainbat kontu izan dituzte hizpide goizean zehar egin zaien elkarrizketan.
Donostiako alkatea baino lehen, "ez zuelako ezer egin"
Altunak gogoan du 1977ko urtarrilaren 19an Ikurrina jaso zutela, Donostian altxatu aurretik: "Ez genuen nahi Donostiako alkateak domina guztiak eramatea, Ikurrina berak ekarriko balu bezala. Horregatik jarri genuen egun bat lehenago".
Tellamendiko gurutzea botatzea, "terrorismoa"
Bestalde, Julian Unzuetak Tellamendiko gurutzearen aurkako ekintza ekarri du gogora –orduko argitalpen bat ere ekarri digu–: "Eztabaida bizia izan nuen Vilarealeko teniente koronelarekin. Tellamendiko gurutzea botatzea ekintza terrorista bat zela esan nion nik eta teniente koronelak terrorista deitzen ari nintzaion galdetu zidan. Nik erantzun nion Aramaion ordura arte ekintza terroristarik ez zela egon, gurutzearen aurkako ekintza gertatu arte. Eztabaida luze baten ondoren, aginduak bete zituela esan zidan".
