Bergara, ezin berdindu
Espero bezalako partidua izan zen Real Union eta Bergararen artekoa, gogorra; izan ere, sailkapenean oso parekatuta dabiltza bi taldeak.
Lehenengo zatian iritsi zen etxekoen gola; falta bat atera ondoren urruntzen asmatu ez, eta gola. Halaxe joan ziren atsedenaldira eta bigarren zatia hasi orduko Real Unionen bigarren gola etorri zen, bosgarren minutuan hain zuzen. Horren ostean lasaitu egin ziren etxekoak eta orduan Bergara izan zen zelaian jaun eta jabe.
Halaxe iritsi zen Anderren gola. "Jokoa aldatu dugu eta mendean hartu ditugu. Arean sartuta egon gara bigarren zati ia denean, baina azkenean ez da iritsi berdinketaren gola", zioen penaz Neka Galan entrenatzaileak bukaeran.
Lehenengo gola Mondrarena
Mondrakoek puntuak behar dituzte zulotik atera eta aurrera egiteko, eta hirurak eskuratzekotan ere izan ziren zapatuan, Zumarragan. Izan ere, jarrera aldatuta eta gogotsu zelairatu zirela jakinarazi du Mikel Garcia atezainak eta hori igarri egin zela jokoan. Hala, lehenengo zati polita jokatu zuten, Urolakoei hortzak erakutsita, baina ez zen golik iritsi.
Bigarren zatiaren hasieran etorri zen hain zuzen gola; Andoni Aizpuruak egin zuen. Baina ondorengo jokaldian, 55. minutuan, Delpa kaleratu zuen epaileak bigarren txartel horia erakutsita, eta horrek aldatu egin zuen partidua. Larri ibili ziren Mondrakoak ordutik, eta hiru puntuei eusten ahalegindu arren 78. minutuan Urolakoek berdindu egin zuten.