Abuztuan, Oñatira iritsi zen idatzian 1981eko legearen arabera, Espaniako bandera udaletxeetan ez ezik, eraikin publiko guztietan jarri behar dela gogorarazten bazen ere, ikurra udaletxean jartzea eskatzen zuten.
Idatzia jasotzean, zinegotzi jeltzaleei jasotako errekerimenduaren berri eman zitzaien eta zenbait kontsulta juridiko ere egin ziren abuztu eta iraila bitartean. Horren gaineko erabaki formalik hartu barik, ez zen inolako helegiterik aurkeztu, baina agindua ere ez zen bete, Udal ordezkariek aurreratu dutenez.
Azaroaren 3ko dataz, Gobernu Ordezkaritzak Donostiako auzitegiko lehen aretoan kontentzioso administratiboa jarri zuen. Handik jasotako idatziaren arabera, Oñatiko Udalak, 20 eguneko epea zuen epaitegian azaltzeko. Udalak, bere izenean azaltzeko, abokatu eta prokuradore bana izendatu dituela jakinarazi zuen abenduan egindako osoko bilkuran.
Bergarara ere abuztuan iritsi zen
Bergarako alkateak baieztatu digu Bergaran ere abuztuan jaso zutela errekerimendua, eta eskaera bete ez dutenez, auzitara eroan dituela Gobernu Ordezkaritzak. Honakoa esan du: "Oñatiarren egoera berdinean gaude. Dagoeneko abokatua eta prokuradoreak izendatu ditugu".
Arrasateko Udalean galdetuta, errekerimendurik ez dutela jaso esan aurreratu dute.