Neskatila bergararra izan da urte berrian mundura etortzen lehen debagoiendarra eta baita EAEko aurrenekoa ere. Urte zahar gaueko kanpaiak jo eta gutxira, 00:25ean, jaio zen, hiru kilo eta 300 gramorekin.
Oscar Sanchez eta Eneritz Eguren aita-amek ez zuten uste 2011-2012 mugan ibiliko zirenik, abenduaren 21erako espero zutelako berez, baina urte berrian noiz sartuko zain egon da, antza, Paule txikia; baina behin 2012an sartuta, hori bai, inor baino azkarrago ibili da Bergarakoa.
Bikotearen lehen haurra da eta osasuntsu dago; eta gurasoak ofizio berria ikasten ari dira, pozik.
Azkena, oñatiarra
2011n jaiotako azken debagoiendarra, berriz, oñatiarra da: Jon Odriozola Zubia. Abenduaren 29an jaio zen eta etxerako bidea hartu du gaur goizean Fernando eta Mireia aita-amekin. 4,780 kilorekin, mutiko bikaina da Jon eta etxean izango da honezkero 6 eta 3 urteko Ane eta Leire arreben gozamenerako. Hemen, azpiko argazkian, Jon, aitaren besoetan.
