Egubakoitzean, haizerik ezean, atseden hartzea erabaki zuten Transantartika espedizioko kideek, indarrak berreskuratzeko. “Ondo etorri zaigu, nahiz eta, eguna oso luzea egin zaigun” azaldu du Juan Vallejok. Zapatuan ere, ez zuten haizerik izan, baina aurrera egitea erabaki zuten, lerak euren indarraz mugituz. “23 kilometro egin ditugu eta azkenean giltzurrunetako izugarrizko minaz bukatu dugu. Hala ere, hemen gaude Gabon kantak abesten” adierazi du txantxetan Vallejok. Atzokoa egun hobea izan zen eta 65 kilometro egin zituzten.
Hego Poloa 340 kilometrora
1.858 kilometro egin dituzte jada eta 340 gelditzen zaizkie lehen helmugarako, Hego Polorako. Mikel Zabaltzak espedizioko kideak nola aurkitzen diren azaldu zuen atzo, telefonoz eginiko konexio baten: “Gero eta animatuago gaude, izan ere, Hego Poloa gero eta gertuago dugu, baina okerrena pilatutako nekea da”.