Monster enplegu atari ezagunak Gabonetako enpresako afariaren eragina aztertu du eta galdetutako langileen ia erdiek erantzun dute afari horretan egin edo esan dutenaz damutzen direla. Monsterren esanetan, ia gehienetan alkohola neurriz kanpo edatearen ondorioz gertatu dira jokabide horiek.
Beste emaitza batzuk hauek dira: zenbait egunetan lotsatuta egon dira inkestatutako langileen %13, eta "jokabide zalantzagarria" izan dutela, baina ez zuela "eraginik izan" aitortu dute beste %14k.
Hala ere, beste %5ek esan duenez, afarian izandako jokabide zalantzagarri horrek "bizitza profesionalean modu zuzenean eragin" diezaieke, eta kasu batzuetan langilea kalean geratu da horregatik.
Aukera moduan hartu
Hori galarazteko, Monster enpresako marketin zuzendari Veronica Milok gomendio hauek ematen ditu: "Enpresako afariak oso aukera ona dira taldearen morala jasotzeko eta lankidetasuna sustatzeko, baina ohiko jokaera profesionalaren kodeak jarraitu behar dira".
Beste gomendio batzuk hauek dira:
- Kontuz alkoholarekin… eta sare sozialekin. Kontuz ere beste batzuk agertzen diren argazkiak euren baimen barik Flickerren edo Facebook-en argitaratzearekin: ondorioak izan ditzake.
- Egokitu janzkera afariaren girora.