Batzar Nagusietan hondakinen gaineko eztabaida eta hausnarketa egingo dute ondorengo sei hilabeteotan. Horrekin batera, Bilduk ez du oztopatuko orain arte aurreikusi eta onartu diren azpiegiturak. Hala esan du Markel Olano EAJren bozeramaile eta ahaldun nagusi ohiak.
Akordioa atzo itxi zuten EAJk eta Bilduk eta, hala, Batzar Nagusietan osoko zuzenketak bozkatzeko saioan, EAJk atzera bota du Bilduren aurrekontuari aurkeztutako osoko zuzenketa. Sozialistek eta PPkoek eurek aurkeztu zituzten osokoei eutsi diete.
Aurrekontuak abenduaren 22an bozkatuko dituzte.
Errauskalilua oztopo nagusia
Errauskailua izan da akordioa lortzeko oztoporik nagusiena negoziazioan. Baina lortu dute adostasuna: Batzar Nagusietan datozen sei hilabeteetan ez dute erabakirik hartuko, hondakinen gaineko hausnarketa egingo dute, eta, aldi horretan Bilduk ez du oztopatuko orain arte aurreikusi eta onartu diren azpiegiturak.
Gipuzkoako Hondakinen Partzuergoa gaur batzartuko da.
Markel Olano EAJko bozeramaileak esan du "gustura" daudela, "Gipuzkoari ekarpena" egin diotelako. Martin Garitano ahaldun nagusia ere pozik agertu da, eta beste eragileei "une zail hauetan arduraz" jokatzeko eskatu die.