Arrasaten egin duten prentsaurrekoan salatu dute PSE-EE eta PP-rendako pobreenak direla egungo krisiaren errudun. "Gizarte laguntzak kentzen badituzte, pobreak pobreago izango dira. Euren egoera asko zailduko da, muturreraino", esan du ESK sindikatuko kide Felix Irizarrek. Gainera salatu dute hurrengo urtera begira hartutako erabakia elkartasun bakoa dela: "Elkartasunezko erabakia dela saldu digute, baina ez da horrela. Erabakiak aurrera egiten badu familia asko amildegian egongo dira".
Baldintza berriak
Aurrerantzean hiru urteko errolda beharko da gizarte laguntzak kobratzeko –orain arte urtebeterekin nahikoa zen–. "Neurri horrekin milaka gazte eta immigrante sistematik kanpo geratuko dira. Gainera, edozein lan onartu beharko dute. Hori horrela, edozein baldintzatan lan egitera behartuko dituzte", dio Irizarrek.
"Manipulazioak"
Bestalde, hurrengo urteko aurrekontuetan murrizketak egiteko PSE-EEk emandako datuak "manipulatutakoak" direla esan dute. "Gizarte laguntzatan ez da apenas iruzurrik egotean. Ez da egia immigranteak gurera gizarte laguntzak kobratzera datozenik, eta gezurra da gizarte laguntzen kostoa jasangaitza dela", esan dute ESK sindikatukoek.
Gema Zabaletaren dimisioa
ESK sindikatuak Gema Zabaletaren dimisioa eskatu du. "Gure giza-sistemaren sostengu funtsezkoenetako bat desegin nahi du. PSE-EEk eta PPk elkarrekin bozkatuko dute Legebiltzarrean Diru-sarrerak bermatzeko eta gizarteratzeko legearen moldaketa, eta horrek murrizketak ekarriko ditu. EAJ abstenitu egingo da", esan dute.