Auto elektrikoak kargatzeko bi gailu jarri dituzte Arrasateko Eroski hipermerkatuaren aparkalekuan. Ezkerreko sarreraren ondoan jarri dituzte eta urdin koloreko bi zutaberen itxura dute.
IBIL SAren (Eve eta Repsolek osatutako enpresa) bitartez jarri dituzte kargagailuok eta helburua da herritar guztiei ematea zerbitzua, ez bakarrik hipermerkatuko bezeroei, "nahiz eta oraindik ia erabiltzailerik ez dagoen", Eroskiko ordezkarien esanetan.
Autoa kargatzeko, txartela
Arrasateko hipermerkatuan jarri dituzten gailuak erabiltzeko IBIL enpresarekin txartela kontratatu behar da –telefono txartelaren antzekoa– eta hori erabiliko da kargagailuan sartu eta autoa kargatzeko. Prezioari dagokionez, kilometroa dieselaren %25 da, gutxi gorabehera, hipermerkatutik aurreratu dutenez.
Eroskitik aurreratu duten moduan, oraindik auto elektrikodun erabiltzaile gutxi badago ere, Eroskik eta IBILek elkarlanean dihardute EAEn auto elektrikoa bultzatzeko. Horrekin, mugikortasun iraunkorraren eta ingurumenarekiko errespetuaren alde egiten dute, hirietan eta herrietan kutsadura txikituta. Aipatzekoa da auto elektrikoek ez dutela kutsadura akustikorik sortzen, ezta emisiorik ere, eta, galera mekaniko gutxiago izateaz gain, errendimendu energetiko handiagoa dutela, mantentze-kostu txikiagoa eta kilometroko kostu txikiagoa.