Haurraren garapena globala da. Lehenengo 7-8 urteetan identitate psikikoa eraikitzeko denbora da eta haurrak adierazpen motrizaren bidez azaltzen ditu bere zailtasunak. Horregatik da hain garrantzitsua haurrari bere historia espazioan proiektatzeko aukera ematea.
Bergarako Luzaro psikomotrizitate eskolak antolatu ditu X. Jardunaldiok. Hainbat aspektu landuko dira bertan; tonua, mugimenduaren sorburua, hezitzaileen eginkizuna... “Gaurko egunean haurren hezkuntzako alorrean ari diren taldeen eskutik eskaera handia dago umeen heltze-prozesuan psikomotrizitateak duen garrantzia ulertzeko eta garatzeko”, adierazi du Luzaro eskolako Nati Sanchezek.
Ikerketa esparru berriak
2005. urtean Bergarako eskolan abiarazitako psikomotrizitate-laguntzaren alorreko prestakuntza modulua nabarmendu du Sanchezek. “Modulu horren bidez, hezkuntzaren esparruan egun premiazkoa den behar bati erantzun zitzaion: “normaltasun”aren esparruan dauden umeak izanda ere, heltze-prozesua modu orekatuan egiteko zailtasunak dituzten umeen beharrei erantzutea. Horrelako umeak eskolaren esparruan hauteman daitezke, eta psikomotrizitate-laguntzako esku-hartze batekin erantzuteko aukera dago”, azaldu du Sanchezek.