Frantzia eta Espainiako gobernuei eta euskal jendarteari zuzendu zaie, bereziki, ETA komunikatuan. Eta baita ETAkideei ere.
Asteleheneko Bake Konferentzia
Asteleheneko bilkurari erreferentzia egiten hasi du komunikatua. Nazioarteko Konferentzia "garrantzi politiko handiko ekimena" dela dio.
Euskal Herrian "aro politiko berri bat zabaltzen" ari dela dio, "mendeetako gatazka politikoari konponbide justu eta demokratikoa emateko aukera" historikoa dagoela. Elkarrizketa eta akordioa beharrezko direla eta "Euskal Herriaren aitortza eta herri borondatearekiko begirunea ukazioari gailendu" behar zaiola.
Erakundearen bandoan jauzitakoak eta kartzelan daudenak gogoratzen ditu komunikatuak. Aurrera begira, halere, borroka dela bidea dio komunikatuak.
"Etorkizunari itxaropenez begiratzeko unea da. Baita ausardiaz eta arduraz jokatzeko unea ere" dio.
Gobernuei deia
Jarduera armatua uzten duela esateaz gain, Espainiako eta Frantziako gobernuei deia: "gatazkaren ondorioei konponbide ematea helburu izango duen elkarrizketa prozesu zuzena zabaltzeko".
Azken deia euskal jendarteari: konponbide prozesuan murgil dadin, "bake eta askatasun agertoki bat sortu arte".