Rafael Bengoa Osasun sailburuak jakinarazi duenez, joan den urriaren 10ean zabaldu zuten Bularreko Minbiziaren Antzemate Goiztiarreko Programa. EAEn dauden 40-49 adin tarteko 170.000 emakumeei gutuna bidaliko diete etxera, telefonoz deituko dietela jakinarazteko; bularreko minbizia garatzeko dituzten aukerak aztertzen laguntzea izango du dei horrek helburu.
Berritasun honekin, lehen graduko ahaideren batek (ama, aita, neba-arreba, seme edo alaba) minbizia izan duen kasuetan, mamografiak egingo dizkiete 40-49 urteko emakumeei, gaitza baztertu ala diagnostikatzeko eta, beharrezkoa den kasuetan, tratamendua ezartzeko.
Osasun sailburuaren esanetan, abian jarri den neurri horri esker, bularreko minbizia garatzeko arriskuan dauden 40 eta 49 urte arteko emakumeak identifikatu ahal izango dira, gaitzari ahalik eta azkarren aurre egiteko.
EAEn emakumeen heriotza gehien eragiten dituen gaitza
Bularreko minbizia da EAEko emakumeek gehien pairatzen duten tumore txarra; batez beste, 1.175 kasu diagnostikatzen dituzte urtean; eta EAEko emakumeen artean heriotza gehien eragiten dituen gaitza da.